紡織及製衣界立法會議員鍾國斌（Felix）早前喺烈日當空下行市集，能夠頂住大汗疊細汗行市集，除咗因為佢對市集情有獨鍾，亦因為對市集發展有一定研究，佢認為可以因應郵輪訪港嘅船期，喺啟德郵輪碼頭舉行市集，咁就可以善用郵輪碼頭呢個地方嘞！
鍾國斌認為於啟德郵輪碼頭搞市集有發展潛力。（陳宛彤攝）
啟德郵輪碼頭早喺一三年落成，但使用率同帶動嘅周邊人流都不似預期，有人更將之形容為死城，Felix今次拋出呢個方案，希望市集吸引旅客之餘，亦都可以吸引港人到訪，真正善用郵輪碼頭。
展現特色 吸引旅客港人
Felix認為，旅客去旅行都係想了解當地特色，而市集就係最佳途徑之一，好似佢自己去旅行都必定會去市集，所以旅客一落船就有得行市集就更加方便；再者近年愈嚟愈多港人鍾意行市集，Felix以深水埗區一幢活化工廈為例，話每逢周末舉行市集都人山人海，難怪佢睇好喺郵輪碼頭搞市集，Felix今次諗頭十足，就睇嚇當局會否著手研究落實嘞！
卓妮
原文地址：http://orientaldaily.on.cc/cnt/news/20170418/00176_071.html
