中環出更：家族生意 史昊洺升績當加薪

早前有調查指超過六成打工仔跳槽係因為想加薪，但唔係個個都可以話跳就跳，卓妮早前喺一個活動上見到香港青年工業家協會青委會主席史昊洺（Kenneth），經營家族生意嘅佢就冇得好似其他打工仔咁隨時跳槽，又冇得要求阿爸加人工，點算好？佢就話一定要積極搵方法提升業績囉！

香港青年工業家協會青委會早排聯同十四個工商界青年團體舉辦「香港青年工商界聯歡晚宴」，講起打工仔跳槽嘅問題時，呢班冇得轉工嘅朋友又點諗？今年負責籌備嘅Kenneth就話返屋企幫手嘅人通常唔係因為份人工，而係基於一份使命感，覺得要將家族生意延續兼發揚光大，如果想追得上甚至超過出面嘅人工，就一定要不斷努力諗方法喇！

蔡德昇曾被爸爸炒魷

最近自己開公司做老闆嘅香港中華出入口商會青年事務委員會主席蔡德昇，就自爆初出茅廬時幫爸爸打工，但短時間內就畀阿爸炒魷魚，其後佢出去打工，一打就打咗十幾年。佢話有啲打工仔跳槽可能係為咗一千幾百，但其實搵工如投資，與其跳嚟跳去，不如揀啱一份有前景嘅。好似佢舊公司咁，最初入去只係得約三十個員工嘅中小企，後來佢離開時公司已有四百幾人，佢嘅職位及薪酬當然亦有與公司一同成長，省卻頻頻轉工嘅問題。

史昊洺（左）同香港中華廠商聯合會青年委員會主席顏明秀（右）都有學泰拳。

中華總商會青年委員會主席黃楚恒都好認同轉工唔可以太頻密，對日後搵工亦會有影響，佢就遇過一啲求職者返咗一兩日工就消失。香港工業總會青年委員陶俊裕及香港O2O電子商務總會創會副會長孫榮聰就認為政府經常話關注青年問題，但往往泛指剛畢業嗰群，而忽略咗佢哋呢班已工作咗一段時間嘅人。

卓妮