連英文名都叫做Snoopy，可想而知東方龍獅後衞鄭璟昊對ACG（動漫電玩）的癡迷程度已達神級！再加上該名獨居的「超御宅族」，家中有一道所有ACG狂迷夢寐以求的「嘆息之牆」，放滿了《龍珠》、《ONE PIECE》，甚至是《Chucky》的Figure，兼且「阿井」平日愛留在家中玩貓、睇動漫、健身……「球壇超宅男」之名捨「井」其誰！
圖/文：司徒子文
問到為甚麼雄赳赳的大男人，會把自己的英文名改成可愛的Snoopy，「阿井」坦言是為了「女」：「都有成6、7年前嘅事，嗰陣時個女朋友好鍾意Snoopy，仲成日話我眼細細好似佢，當時我又無英文名，咁咪改自己個名做Snoopy氹佢囉！不過，自從改咗呢個名後，我每次喺街見到得意嘅Snoopy產品都會買，成為我屋企嘅收藏！」
「嘆息之牆」裝滿童年回憶
踏入「阿井」家中，不其然會被其滿布動漫Figure收藏品的「嘆息之牆」所吸引。「阿井」直言這是每一位「大男孩」的夢想：「相信我同好多港產ACG迷一樣，細個時好想擁有呢批玩具，所以長大後有經濟能力，就自然好想買番呢啲『童年回憶』！再加上我自細就要同兩個家姐同房，無私人空間，所以早幾年搬出嚟後，當然要『任性』一下，砌番個Figure櫃啦！」在眾多收藏當中，「阿井」表示最愛《龍珠》比達、與《ONE PIECE》索隆角色，皆因他倆都是努力訓練來提升自己的熱血人物，就好像自己在球場上雖永遠不是當主角材料，但一直也靠努力、不服輸去追趕着！
《龍珠》拉近父子距離
提及童年回憶，「阿井」表示與父親一起捱夜睇《龍珠》的日子，正正令兩父子增進感情：「嗰時電視到深夜先會播，我同老竇會趁阿媽、家姐瞓晒，好似親子活動咁睇《龍珠》！可能因為咁，我同老竇感情特別好，依家每次我有比賽，佢都會到場支持！」不過，「阿井」批評最近《龍珠》推出續集已大不如前，如果有機會讓他跟作者鳥山明講句說話，他會直言：「唔好搞咁多嘢啦！之前打完布歐就應該完咗佢，畀番啲美好回憶大家好唔好？」
現時獨居的「阿井」，平日愛安在家中做「宅男」，兩年前收養了英國短毛貓MM：「雖然搬出嚟可以有自己空間，但夜闌人靜時都幾寂寞，所以就養隻貓陪自己。」又養貓、又愛留在家、又是ACG迷……「阿井」都算是一位相當稱職的「宅男」！
「金井」最痛家人做箭靶
談到近年經常成為球迷指罵攻擊的對象，鄭璟昊坦言感到難受：「我自問係一個心理質素好弱嘅人，加入咗東方第二年之後開始畀自己球迷柴台，搞到自己愈踢愈慌！其實我踢得差、唔爭氣，畀你鬧可以話係抵我死，但我最介意係點解要用粗口鬧埋我屋企人先？我老竇每場波都會入場支持我，但就畀班球迷指住鬧，我真係好心痛！」
「阿輝」教路應付噓聲
平日有上網習慣的「阿井」，當然也有留意到網民對他的謾罵，「金井」（意指為金判坤契仔才入選港隊）、「後防響警號」（璟昊的同音）等花名也能叫他一笑置之，但返回現實世界，落場比賽的喝倒采，卻讓「阿井」綁手綁腳：「『阿輝』（葉鴻輝）都同我分享過自己畀人噓嘅經驗，佢話只要夠硬淨，心諗唔可以衰畀你睇，一定可以克服到！可惜嘅係我唔似『阿輝』咁硬淨，畀人噓多兩噓就冇晒信心，希望今季可以喺呢方面有所改善，踢好啲波贏番掌聲！」
本文來源：http://hk.on.cc/hk/bkn/cnt/sport/20171031/bkn-20171031233932118-1031_00882_001.html
